Tobba Marínós datt ofan í klósettið

Tobba Marínós lenti í sjálfheldu inni á eigin salerni.
Tobba Marínós lenti í sjálfheldu inni á eigin salerni. mbl.is/Íris Ann Sigurðardóttir

Tobba Marínós lenti heldur betur í óförum um helgina en hún náði að mölbrjóta klósettsetuna heima hjá sér og lenda ofan í klósettinu. Hún slapp þó nokkuð vel út úr aðstæðunum en hún lýsti óförunum í samtali við morgunþáttinn Ísland vaknar. 

Var hún nýbúin í sóttkví í kjallaranum þegar atvikið átti sér stað en hún hafði byrjað á því að lakka allar hurðar og glugga í kjallaranum í sóttkvínni.

„Svo líða þrír dagar og þá lendir besta vinkona mín sem var með mér í þessari sóttkví aftur í sóttkví. Svo hún flytur í kjallarann. Og ég er alltaf að mála gluggana svo hún má bara vera inn í einu herbergi,“ lýsti Tobba. 

Klósettsetan splundraðist

„Svo er ég niðri um helgina og er að mála baðherbergisgluggann og ég stend uppi á klósettsetunni á meðan ég er að lakka gluggann. Þetta er svona harðplast og ég greinilega halla öllum þunganum í annan fótinn sem er á miðri setunni sem fer ekki betur en svo að hún brotnar ekki – nei, hún splundrast.

Það þýðir að ég stend jafnfætis ofan í klósettskálinni og það er ekki þægilegt. Því ef þú bara opnar klósettið þá er ekki gert ráð fyrir tveimur fótum þarna ofan í,“ sagði Tobba en hún segist hafa fengið mikið högg við fallið og að brotin úr klósettsetunni hafi orðið eins og hnífar. Hún hafi því verið nokkuð lemstruð eftir þetta.

 

„Pissublaut í fæturnar“

„Ég náttúrulega öskra bara þarna ofan í – verð pissublaut í fæturnar. Og fíflið vinkona mín situr bara þarna á gólfinu og hlær,“ sagði Tobba og uppskar mikinn hlátur í stúdíóinu þegar hún lýsti því hvernig vinkona hennar gat ekkert gert þar sem hún var í sóttkví. Hún lýsti þá hvernig nágrannakona hennar kom að henni buxnalausri eftir atvikið. 

„Heilráð dagsins, ekki standa á klósettsetunni og alls ekki í miðjunni,“ sagði Tobba að lokum. 

Hlustaðu á Tobbu lýsa klósettóförum sínum í spilaranum hér að ofan.

mbl.is
Í loftinu núna
Endalaus tónlist

#taktubetrimyndir