Mikilvægt að vera gagnrýninn á matinn

Ingi Torfi: Segir það vera mikilvægt að vera gagnrýninn á …
Ingi Torfi: Segir það vera mikilvægt að vera gagnrýninn á matinn sem maður borðar. Skjáskot/Instagram-síða Inga Torfa

Ingi Torfi Sverrisson, macrosþjálfari, ræddi við morgunþáttinn Ísland vaknar um hvernig það sé best að halda næringunni góðri á sumrin þegar góða veðrið og ferðalögin standa yfir.

„Það er bara að vera aðeins gagnrýninn á það sem maður er að borða. Það er voða auðvelt að hugsa „það er sumar ég má þetta, ég ætla að leyfa mér allt“ og maður grillar kannski fjögur kvöld í röð. En svo er stundum hægt að grilla mismunandi hluti því það getur verið rosalegur munur á því hvort maður borði lambakótelettur með kartöflusalati og bjór eða færð þér kannski folaldakjöt og grillaðar kartöflur og grænmeti með og einhverri jógúrt sósu. Það getur verið rosalegur munur ef þú gerir þetta þrjú kvöld í röð og svo hitt, það er bara eins og tveir dagar aukalega í slæmri næringu. Ef þú velur alltaf það sem þér finnst best, gamla góða leiðin sko,“ segir Ingi Torfi.

Grillað lambalæri: Á sumrin elska íslendingar að grilla.
Grillað lambalæri: Á sumrin elska íslendingar að grilla. Ljósmynd/mbl.is

Snýst allt um að taka ákvörðun

Aðspurður út í það hvort sumrin séu ekki sérstaklega hættuleg þegar kemur að slæmri næringu segir Ingi Torfi þetta allt snúast um það að taka ákvörðun.

„Því þetta byrjar allt saman þar. Maður getur sagt við sig; „Í hvaða ástandi ætla ég að koma inn í haustið. Ætla ég enn einu sinni að vera með allt niðrum mig. Lifa lífinu bara í sumar og koma pínu ósáttur inn í haustið eða ætla ég að vera meðvitaður og passa mig svolítið í sumar og vera á nokkuð góðum stað þegar haustið kemur og eldmóðurinn kemur yfir mann.““

Ingi Torfi segir að fólk geti alltaf gert betur. Ef það hugsi að það sé bara í eins góðu ástandi og það vilji vera þá sé það mögulega að reyna að réttlæta eitthvað fyrir sjálfu sér.

„Það er allt í lagi að leyfa sér en bara að vera aðeins meðvitaður. Það er það sem fólkið hjá okkur lærir. Með því að mæla matinn sinn, eins og við höfum nú talað um að vigta og skrá að þá veit maður aðeins betur en maður getur samt leyft sér. Þekkingin er mesta „powerið“ í þessu,“ segir hann.

Sláandi niðurstöður úr rannsókn á tíðni krabbameins

Á dögunum segist Ingi hafa lesið niðurstöður úr rannsókn varðandi tíðni á krabbameini og neyslu á trefjum sem hann segir að hafi verið sláandi.

„Það var þannig að 60 prósent tilvika upptaka krabbameins var rakið til lífsstíls og þú gast minnkað líkurnar á ristilkrabbameini um 32 prósent hjá konum og 25 prósent hjá körlum með því að borða trefjar. Og munið þið, ef þið hugsið til baka, ef þið hlustið einhvern tímann á mig þá munduð þið muna að ég var að ýta ykkur í það að borða trefjar að fylgjast með trefja upptökunni fyrir nokkrum mánuðum og þegar maður sér þetta svona svart á hvítu að með því að passa upp á heilsuna, hreyfa sig, drekka minna áfengi og borða trefjar, þetta er bara ótrúlegar tölur,“ segir hann.

Trefjar má meðal annars finna í grænmeti.
Trefjar má meðal annars finna í grænmeti. Ljósmynd/mbl.is

Ingi segir að þá spyrji sig kannski margir hvar við fáum trefjarnar úr næringunni.

„Það er úr kolvetnum, af því trefjar eru kolvetni. Þar eru grænmeti og ávextir og grófmeti. Eitthvað sem margir eru að forðast. Þeir sem eru búnir að vera á ketó og lágkolvetna fæði og þegar þú ert á lágkolvetna fæði þá færðu ekki trefjar nema í litlu magni. Þannig að kolvetnin eru ekki alltaf óvinur manns. Óvinurinn er það bara þegar maður borðar mikið almennt af öllu. Við þurfum kolvetni þannig að maður þarf ekkert að hafa áhyggjur af því ef maður borðar bara hóflega yfir daginn þá er maður í góðum málum og meltingin og blóðsykurinn og allt verður miklu jafnara,“ segir hann.

Viðtalið við Inga Torfa er hægt að hlusta á í heild sinni í spilaranum hér fyrir neðan:

 

mbl.is

#taktubetrimyndir