Sjósund gaf Ernu lífið og heilsuna til baka

„Það sem sjórinn hefur gefið mér er lífið mitt til …
„Það sem sjórinn hefur gefið mér er lífið mitt til baka.“ Ljósmynd/Facebook-síðan Sjósundnámskeið Ernu

„Kannski vegna þess að í fyrra þá komumst við ekkert til útlanda og okkur vantaði bara eitthvað að fara út að leika. En svo er þetta bara við erum að uppgötva áhrif kælingar líka og þetta er svona kannski mjög einfaldað tvíþætt. Fólk sem er að fara út í sjó bara og sulla og nýta kælinguna og njóta því þetta er biluð tenging við náttúruna. Fyrir mér er munurinn, sko þú ferð út að labba út í skóg og þú ert úti í náttúrunni, úti í sjó er ég bara hluti af náttúrunni,“ segir Erna Héðinsdóttir sem hefur stundað sjósund frá árinu 2017, spurð út í nýlegar vinsældir sjósunds.

Sjósundið gaf henni lífið og heilsuna til baka

Erna mætti í viðtal í morgunþáttinn Ísland vaknar þar sem hún greindi frá því að sjósundið hefði hreinlega gefið henni lífið og heilsuna til baka. Hún segist sjálf mæla með Nauthólsvíkinni og Fossvoginum fyrir byrjendur og segir aðstæður þar alltaf nokkuð öruggar.

„Hann getur alveg verið gruggugur og stundum verður smá græn slikja á honum þegar það eru einhverjir þörungar og einstaka sinnum sjáum við einhverjar marglyttur og eitthvað en hann er ekki hættulegur og við eigum að geta treyst veitukerfinu líka. Það er verið að veita affallinu okkar það langt út í sjó að þetta þynnist það hratt að þetta er ekki hættulegt okkur. Og ef eitthvað gerist þar, það er búið að henda of miklum blautþurrkum í klósettin, þá stundum þarf eitthvað að stoppa og gera og græja og þá eru nú yfirleitt sendar út tilkynningar eða alltaf held ég,“ segir Erna.

„Við þurfum að bera fulla virðingu fyrir sjónum, hann eðlilega …
„Við þurfum að bera fulla virðingu fyrir sjónum, hann eðlilega getur verið hættulegur.“ Ljósmynd/Facebook-síðan Sjósundnámskeið Ernu

Erna segir mikinn mun á því að stunda sjósund í sundfötum eða í svokölluðum sjósundsgalla.

„Munurinn á gallanum, þú veist þegar sjórinn er 2-4 gráður þá get ég verið í 10 mínútur í sundfötum en klukkutíma í gallanum. Mér verður fyrst kalt á puttunum og mér hefur aldrei orðið virkilega kalt í gallanum. Ég er jafnvel þannig að ég fer inn í bíl og gleymi að kveikja á miðstöðinni,“ segir hún.

Þurfum að bera virðingu fyrir sjónum

Erna hefur verið að halda námskeið í sjósundi þar sem fólk fær bæði fyrirlestra og kennslu. Þar kennir hún fólki á sjóinn og hjálpar því fyrstu skrefin til þess að komast út í sjó.

„Við þurfum að bera fulla virðingu fyrir sjónum, hann eðlilega getur verið hættulegur. Maður þarf svolítið að vita hvað maður er að gera, þú ferð ekkert alveg hvar sem er út í í hvaða veðri sem er,“ segir hún.

Áður en Erna fór að stunda sjósund lifði hún við krónískan höfuðverk á hverjum einasta degi. Hún segir sjósundið hafa bjargað sér og viðurkennir að áður fyrr hafi hún verið mikil kuldaskræfa.

„Þetta gaf mér lífið og heilsuna til baka. Upphaflega fer ég af því að ég á við krónískan hausverk að stríða, vaknaði með hausverk, var alltaf með hausverk, mígreniverk tvisvar þrisvar í viku. Strákurinn minn, sjúkraþjálfarinn hans sagði honum að kæla á sér ökklann, svona heitt og kalt til skiptis eftir að hann sneri sig á ökkla og ég hugsaði ætli þetta virki á hausverkinn minn? Ég komst ekki ofan í kaldan pott, ég var svo mikil kuldaskræfa. Ég sko labbaði ofan í kalda pottinn og það beygðust engin liðamót til þess að setjast niður. Þannig að mér tekst að bakka út í sjó sumarið 2017 fyrst og hann var örugglega 10-12 gráður. Ég vildi að ég vissi hvaða dagur þetta var og hvað hann var heitur en ég veit það ekki af því að það var aldrei eitthvert plan. Það sem sjórinn hefur gefið mér er lífið mitt til baka af því að þetta var ofboðslega hamlandi að vera alltaf með hausverk,“ segir hún.

Hægt er að hlusta á viðtalið við Ernu í heild sinni í spilaranum hér fyrir neðan:

mbl.is

#taktubetrimyndir