Einar Bárðarson, sem ásamt félögum sínum í Helgarútgáfunni á K100 leysir þá Jón Axel og Ásgeir Pál af í morgunþættinum Ísland vaknar, sagði brandara í beinni í morgun sem að því er virðist hitti ekki í mark. Reyndi Einar þar að feta í fótspor þeirra Jóns og Ásgeirs sem þekktir eru fyrir fimmaurabrandara á morgnana.
Brandarinn var á þá leið að hann hefði ítrekað reynt að gera heimili sitt öruggt fyrir börnum (e. child proof) en samt kæmust þau alltaf inn. Vakti brandarinn og viðbrögð þáttastjórnenda athygli twittverjans @birkirh sem setti inn skemmtilegt myndband á samfélagsmiðilinn í morgun með orðunum „þegar maður gerir tíst sem fær 0 læk“. Í þessu samhengi verður brandarinn og viðbrögð samstarfsmanna Einars enn fyndnari. Myndbandið getur þú séð hér að neðan.
Einar er hinn sáttasti yfir því „að vera loksins farinn að trenda á Twitter“ og mun mæta galvaskur á vaktina í fyrramálið, eflaust með fleiri brandara í farteskinu.
