Mikið af áhugaverðu sjónvarpsefni er komið eða væntanlegt á Netflix og aðrar streymisveitur á næstunni en bíósérfræðingurinn Björn Þórir Sigurðsson eða Bíó-Bússi stiklaði á stóru um þetta í morgunþættinum Ísland vaknar á K100.
Punky Brewster – Gamanþáttaröð – Peacock:
Vinsælir þættir um unga sniðuga stúlku á níunda áratugnum og fósturpabbann sem er að ala hana upp. Nú er sama leikkona mætt sem Punky sem er núna einstæð þriggja barna móðir.
Ski Bum: The Warren Miller Story - Discovery+ Heimildarmynd:
Hér er farið yfir magnaðan feril þessa skíðakvikmyndmyndaframleiðanda. Frá um 1950 elti hann á röndum helstu skíðasnillinga heims. Myndaði, klippti, hljóðsetti og var meira segja þulur. Hann ferðaðist svo um Bandaríkin og sýndi myndirnar. Myndin byggir á einlægu viðtali sem tekið var við hann í fyrra, rétt áður en hann lést 93 ára að aldri.
The United States vs. Billie Holiday (2021) – Hulu-kvikmynd:
Billie Holiday var mikil baráttukona og óþreytandi í að gagnrýna yfirvöld sem fundu sig knúin til að nota eiturlyfjaneyslu til að reyna að þagga niður í henni.
Billie Eilish: The World's a Little Blurry (2021) – Apple TV+ Heimildarmynd:
Myndin fjallar um ótrúlegt ris Billie Eilish og skyggnist á bak við tjöldin við upptökur og tónleikahald.
Black Renaissance – YouTube Originals:
Febrúar í Bandaríkjunum er tileinkaður sögu blökkumanna en í þessari mynd sem Google framleiðir eru skoðuð áhrif þeirra í íþróttum og skapandi greinum. Barack Obama, Michelle Obama og Kelly Rowland ásamt fleirum leiða okkur í sannleikann.
Biggie: I Got a Story to Tell (2021) – Netflix:
Sagan á bak við hip hop-goðsögnina Notorious B.I.G –Biggie Smalls eða Christopher George Latore Wallace eins og hann hét fullu nafni. Í myndinni fæst innsýni í hans heims með áður óséðu myndefni.
Debris: Sería 1 (2021) 10 p.m., NBC:
Dularfullt geimrusl fellur til jarðar og undarlegir hlutir koma fyrir þá sem það snerta. Breskir og bandarískir starfsmenn leynilegrar stofnunar eru settir í að rannsaka málið. Smá X-files fílingur í þessu.
Moxie (2021) – Netflix-bíómynd:
Ung feimin stúlka fær nóg af kvenfyrirlitningu og eitruðu umhverfi og leitar innblásturs hjá móður sinni sem var ansi róttæk á yngri árum og gefur út bækling sem kveikir hressilega undir. Byggt á bók Jennifer Mathieu og leikstýrt af Amy Poehler sem leikur einnig móðurina.
Hámhorfsserían Black Sails - Hún fær 81% á Rotten Tomatos og 8.2 á IMDB -Fjórar þáttaraðir hafa verið gerðar, samtals 38 þættir allir til á Hulu:
Sagan er nokkurs konar forsaga Fjársjóðseyju Robert Louis Stevenson og gerist 20 árum áður. Kafteinn Flint og John Silver ásamt fleiri þekktum karakterum úr sjónræningjaheiminum takast á við bresk stjórnvöld um yfirráð yfir Nassau og skipum sínum. Eru svolítið hægir af stað en upp úr 3.-4. þætti fer þetta í gang. Michael Bay er einn af framleiðendum þáttanna.
