Það er gott að dvelja á Austurlandi

Við elskum Ísland í vetur og förum í stuttar helgarferðir innanlands. K100 ætlar að kynna sér skemmtilega áfangastaði í öllum landshlutum og fara í stuttar helgarferðir. Fyrsta ferð vetrarins var farin austur þar sem þeir Logi Bergmann og Siggi Gunnars kynntu sér hvað Austurland hefur upp á að bjóða. Sendu þeir félagar Síðdegisþáttinn beint frá Vök Baths á Egilsstöðum og mættu nokkrir hressir viðmælendur til þeirra.

Ívar Ingimarsson heimsótti Loga og Sigga í Vök Baths.
Ívar Ingimarsson heimsótti Loga og Sigga í Vök Baths.

Spilaði með úrvalsdeildinni í fótbolta en býr nú á Egilsstöðum

Ívar Ingimarsson þekkja margir Íslendingar úr fótboltaheiminum en hann spilaði meðal annars með Reading F.C. í úrvalsdeildinni. Það sem kannski færri vita er að hann er uppalinn á Stöðvarfirði.

Ívar mætti í viðtal til þeirra félaga og ræddi þar um fótboltaferilinn og landsbyggðarlífið.

Hann segir skrítið að horfa til baka í dag og velta því fyrir sér að hann hafa búið í litlu sveitarfélagi en samt komist út til Englands á samning.

„Það er fullt af krökkum alls staðar í kringum landið sem hafa allskonar drauma og menn verða bara að láta reyna á það,“ sagði hann.

Þegar Ívar kom aftur heim til Íslands eftir að hafa spilað fótbolta úti í Englandi segir hann að þrír staðir hafi komið til greina til þess að búa á, Reykjavík, Akureyri eða Egilsstaðir. Að lokum hafi þau séð tækifæri í ferðaþjónustunni fyrir austan og fluttu því á Egilsstaði.

Fullt af viðburðum fram undan á Austurlandi

Þá mætti hún Jónína Brynjólfsdóttir frá Austurbrú til þeirra Sigga og Loga en hún segir síðasta sumar hafa verið rosalega gott. Margir Íslendingar hafi heimsótt Austurland og vegna þess hversu langt er að fara hafi þeir stoppað lengi í einu. Hún segir talsverða traffík erlendra ferðamanna vera á staðnum yfir haust- og vetrartímann en vegna Covid hafi nú fleiri Íslendingar verið á ferðinni.

Hún segir Austurland vera frábæran áfangastað til þess að koma á. Þar séu náttúruperlur, gönguferðir og fullt af viðburðum fram undan.

Hægt er að forvitnast um hina ýmsu viðburði sem eru á döfinni fyrir austan á austurbru.is.

Skólabræður Gauti Jóhannesson og Logi Bergmann en þeir voru saman …
Skólabræður Gauti Jóhannesson og Logi Bergmann en þeir voru saman í FÁ í denn.

Var honum ekkert fjær en að flytja út á land

Gauti Jóhannesson, sveitarstjóri í Djúpavogshreppi, vann á dögunum stóran kosningasigur þegar sameining nokkurra sveitarfélaga á Austurlandi gekk í gegn.

Hann viðurkennir að þegar hann var yngri hafi ekki verið mikil landsbyggð í honum og að ekkert hafi verið honum fjær heldur en að flytja út á land. Það hafi hins vegar breyst árið 1986 þegar hann, ásamt eiginkonu sinni, ákvað að flytja til Staðarborgar í Breiðdal. Þar hafi orðið kaflaskil og ákveðin uppljómun átt sér stað. Í kjölfarið hafi þau tekið ákvörðun um það að til Reykjavíkur ætluðu þau ekki meir.

Gauti segir fordóma gagnvart landsbyggðinni sem betur fer ekki vera eins og þeir voru áður. Þegar hann var yngri þá þótti hallærislegt að vera utan af landi og krakkar hafi átt það til að stríða krökkum sem voru aðfluttir.

Heiður Vigfúsdóttir er framkvæmdastjóri Vök Baths.
Heiður Vigfúsdóttir er framkvæmdastjóri Vök Baths.

Vatnið úr Vök kemur frá botni Urriðavatns

Eins og áður sagði fór útsendingin fram ofan í heitum potti. Hún Heiður Vigfúsdóttir frá Vök Baths spjallaði við þá um staðinn og leyndardóma hans.

Rúmt ár er síðan Vök Baths var opnað en Heiður segir aðdragandann mjög langan. Fyrsta hugmyndin hafi komið fram árið 1999 en þá var hugmyndin sú að opna ylströnd sem afþreyingu fyrir heimamenn. Það hafi síðan verið þrír heimamenn sem hafi seinna gripið hugmyndina og byrjað að kasta henni á milli sín. Að lokum varð Vök Baths að veruleika eftir mikla vinnu.

Vegna Covid þurftu eigendur að breyta plönum sínum og markhópi en Heiður segir það hafa tekist vel til. Þau hafi fengið góðan hóp Íslendinga í sumar og það hafi verið nóg að gera.

Vatnið sem baðgestir fá að baða sig upp úr er eina vottaða heitavatnið til drykkjar á Íslandi. Það kemur beinustu leið frá botni Urriðavatns og er algjörlega drykkjarhæft.  

Hlustaðu á viðtölin í heild sinni hér að neðan.

Ívar Ingimarsson

Jónína Brynjólfsdóttir

Gauti Jóhannesson

Heiður Vigfúsdóttir

mbl.is
Í loftinu núna
Endalaus tónlist