Vinningshafarnir endurnærðir eftir ævintýrið

Eyþór og fjölskylda lentu í ýmsum ævintýrum á ferðalaginu en …
Eyþór og fjölskylda lentu í ýmsum ævintýrum á ferðalaginu en hann vann ferðalag í kringum landið ásamt fleiri vinningum á K100 á dögunum. Ljósmyndir/Aðsendar

Eyþór Örn Eyjólfsson, sigurvegarinn í sumarleiknum „Söngur sumarsins“; á K100, vann ferðalag um landið fyrir alla fjölskylduna ásamt fleiri glæsilegum vinningum á dögunum en fjölskyldan lauk ævintýri sínu um landið um síðustu helgi, 15. ágúst.

K100.is ræddi við Eyþór, vinningshafa „Söngs sumarsins“, um lok ferðalagsins um landið sem hófst 8. ágúst en hann segir að fjögurra manna fjölskyldan og heimilishundurinn hafi öll komið endurnærð úr ævintýrinu. Fjölskyldan samanstendur af Eyþóri og eiginkonu hans, Ingibjörgu Björnsdóttur, og sonunum Daníel Erni, 17 ára, Eyjólfi Erni, 11 ára og hvolpinum Lunu. Greint var frá byrjun ferðalagsins í síðustu viku á K100.is.

Fjölskyldan sá bæði hvali og höfrunga á Rib-hraðbáti á Húsavík …
Fjölskyldan sá bæði hvali og höfrunga á Rib-hraðbáti á Húsavík með Gentle Giants.

Eftir að hafa ferðast til Vestmannaeyja, í Reynisfjöru, Jökulsárlón og um Austfirði lá leið fjölskyldunnar til Húsavíkur þar sem þau dvöldu í þrjár nætur og fóru þau meðal annars í hvalaskoðun með Gentle Giants á Rib-hraðbát.

Hundurinn Luna fékk að fara með á öll hótel en …
Hundurinn Luna fékk að fara með á öll hótel en ferðalagið var skipulagt að hluta til út frá henni.

„Geggjuð“ ferð

„Það var algjörlega frábært veður og hrikalega gaman að sigla langt út á haf. Við sáum bæði hvali og höfrunga í ferðinni sem okkur fannst stórkostlegt,“ segir Eyþór. Segir hann að Eyjólfur, 11 ára, hafi sagt að ferðin hafi verið „geggjuð“ þrátt fyrir að hann hafi sjálfur orðið svolítið sjóveikur á bátnum.

„Húsavík er mjög fallegur bær og við nutum þess að vera þar í góðu veðri,“ sagði Eyþór.

Fjölskyldan fór einnig í dagsferð til Akureyrar og hittu þau á leiðinni Valgeir Bergmann, framkvæmdastjóra Vaðlaheiðarganga, sem fræddi þau um göngin, sem Eyþór segir að hafi verið afar áhugavert. Frábært veður var í bænum og fékk fjölskyldan ljúffengan hádegismat á Fabrikkunni. „Við áttum dásamlegan dag þar sem við nutum góða veðursins, kíktum í sund, röltum um og enduðum frábæran dag á að borða á Múlabergi,“ sagði hann.

FJölskyldan fékk góðan mat á Narfeyrarstofu á Stykkishólmi. Eyþór segir …
FJölskyldan fékk góðan mat á Narfeyrarstofu á Stykkishólmi. Eyþór segir mikilvægt að hafa fengið góðan bíl í ferðalagið en fjölskyldan ferðaðist um á Toyota Land Cruiser.

Fjölskyldan varði því næst tveimur nóttum á Fosshóteli í Stykkishólmi, þau nutu þess að skoða bæinn og borðuðu meðal annars á veitingastaðnum Narfeyrarstofu sem Eyþór segir að hafi verið frábært.

fjögurra manna fjölskyldan og heimilishundurinn Luna eru öll endurnærð eftir …
fjögurra manna fjölskyldan og heimilishundurinn Luna eru öll endurnærð eftir frábært ferðalag. Ljósmyndir/Aðsendar

„Næstsíðasta daginn í ferðinni keyrðum við um Snæfellsnesið og skoðuðum áhugaverða staði eins og til dæmis Rauðfeldsgjá, Arnarstapa, Hellnar og Skarðsvík og svo fórum við í berjamó. Að sjálfsögðu urðum við að stoppa á veitingastaðnum Sker í Ólafsfirði og fá okkur kvöldmat. Við mælum svo mikið með þeim stað,“ sagði hann.

Lager af grímum og spritti

Fjölskyldan gisti síðustu nóttina í ferðalaginu á Stykkishólmi og lagði af stað heim að loknum morgunverði á hótelinu.

Spurður út í það hvernig það er að ferðast um landið eftir að önnur bylgja kórónuveirufaraldurs skall á, sagði Eyþór að fjölskyldan hefði verið dugleg að nota grímur og spritt og hefðu ekki látið faraldurinn hafa mikil áhrif á ferðalagið. „Við höfum getað gert allt sem okkur langaði þó svo COVID-19 sé að gera okkur erfiðara fyrir í samfélaginu. Við höfum þurft að nota grímur og hanska á mörgum stöðum. Stemningin er góð og það virðast allir vera að gera sitt besta og fólk meðvitað um mikilvægi tveggja metra reglunnar. Við erum með lager af grímum og spritti í bílnum þannig að við erum góð,“ sagði Eyþór.

Eyþór segir að það hafi skipt miklu máli að vera á góðum bíl á ferðalaginu en fjölskyldan fékk afnot af glænýrri Toyota Land Cruiser-bifreið meðan á ferðalaginu stóð. „Það skiptir miklu máli að vera á góðum bíl í svona ferðalagi. Hann er rúmgóður og það fer vel um alla í bílnum. Það er þægilegt að ganga um bílinn og svo er líka stórt skott þannig að við gátum tekið allt það sem við þurftum með okkur,“ sagði Eyþór.

Gott að koma heim endurnærður

Þó svo að ferðalagið hafi verið ævintýralegt þá segir Eyþór að það hafi verið gott að koma aftur heim.

„Það var yndislegt að koma heim eftir þetta frábæra ferðalag. Við gerðum alls konar skemmtilegt, borðuðum góðan mat, skoðuðum landið okkar og nutum þess að vera í fríi öll saman, maður má nefnilega ekki gleyma því að staldra við og njóta en þannig kemur maður endurnærður heim úr svona ferðalagi,“ sagði hann.

Eyþór spjallaði einnig við Ísland vaknar um lok ferðalagsins en hlusta má á spjallið í spilaranum hér að neðan.

mbl.is
Í loftinu núna
Endalaus tónlist