„Bjóst aldrei við að hann yrði svona vinsæll“

Ástu þykir vænt um fyrstu fjölskyldumyndina sem var tekin af …
Ástu þykir vænt um fyrstu fjölskyldumyndina sem var tekin af Hugo ásamt henni og Jóni. Fjölskyldan stofnaði fljótlega Instagram-síðu fyrir Hugo, sem nú er tæplega 9 mánaða, eftir að þau fengu hann en nú fylgja honum 19.500 manns. Ljósmyndir/Aðsendar

 „Ég ætlaði nú bara að búa til Instagram til að halda utan um myndir af honum og fylla ekki mitt eigið Instagram af hundamyndum. Ég bjóst aldrei við því að hann yrði svona vinsæll! Ég hef alltaf haft gaman af ljósmyndun og myndvinnslu. Hugo er líka mikill karakter og ég held að persónuleiki hans og gæði myndanna geri hann eftirtektarverðan,“ segir Ásta Haraldsdóttir, eigandi hundsins Hugos sem má segja að hafi nú hlotið titil áhrifavalds í heiminum en hundurinn er nú með hátt í 20.000 fylgjendur á samfélagsmiðlinum Instagram.

Hundurinn Hugo hefur sannarlega heillað marga enda einstaklega mikið krútt …
Hundurinn Hugo hefur sannarlega heillað marga enda einstaklega mikið krútt og góð fyrirsæta en nú fylgja honum 19.500 manns á samfélagsmiðlinum Instagram.

Glaði hundurinn Hugo

Þar gengur hann undir nafninu „Happy dog Hugo, eða á íslensku „glaði hundurinn Hugo“.

Ásta hefur búið ásamt eiginmanni sínum Jóni Kristjánssyni í Massachusetts í Bandaríkjunum, þar sem hann starfar, í rúmlega eitt og hálft ár en þau hjónin bjuggu til Instagram-aðgang fyrir Hugo fljótlega eftir að þau fengu hann. Hugo, sem er tæplega níu mánaða, er af svokallaðri „mini goldendoodle“-tegund sem er blanda af hundategundunum „golden retriever“ og „toy poodle“. Segir Ásta að fylgjendafjöldi Hugos hafi fjölfaldast í kórónuveirufaraldrinum en í mars á þessu ári fylgdu honum um 5.000 manns.

Schwarzenegger sýndi áhuga

„Þetta hefur farið hratt vaxandi á síðustu mánuðum,“ segir Ásta og bætir við að á sama tíma og fylgjendunum fjölgaði hafi þau hjónin farið að fá mikið af fyrirspurnum frá fyrirtækjum, fjölmiðlum og fólki sem vildu vita meira um Hugo. Meðal annars deildi tímaritið Cosmopolitan mynd af Hugo á Instagram-síðu sinni.

„Toppurinn var samt líklega þegar Patrick Schwarzenegger, sonur Arnold Schwarzenegger, sendi mér skilaboð og hafði áhuga á því að fá sér nákvæmlega eins hund og Hugo,“ segir Ásta.

„Okkur finnst ótrúlega gaman að vera með þetta Instagram og Hugo er orðinn mjög vanur myndavélinni. Stundum þegar ég tek upp myndavélina stillir hann sér upp sjálfur en svo á öðrum stundum er hann þreyttur og þá leyfi ég honum að hvíla sig og bíð bara eftir betra tækifæri til þess að ná góðri mynd,“ segir Ásta spurð út í það hvað Hugo „segi“ við því að vera orðinn Instagram-stjarna. Hún bætir við að eftir að vinsældir Hugos fóru að aukast hafi mörg fyrirtæki sóst eftir samstarfi með þeim og segir að Hugo sé hæstánægður með að fá reglulega nýtt dót og nammi til að smakka.

Ásta segir að þau hjónin hafi dottið í lukkupottinn með Hugo sem er að hennar sögn alveg yndislegur, rólegur, klár og elskar alla.

Gott að vera með félaga í Covid

„Okkur hefur alltaf langað í hund saman en við ferðumst mikið og einhvern veginn hentaði aldrei að eiga hund þegar við bjuggum á Íslandi. Þegar við fluttum til Bandaríkjanna sáum við hvað það er auðvelt að eiga dýr hérna. Flestir veitingastaðir og verslanir leyfa dýr og það er auðvelt að ferðast með þau innanlands,“ segir Ásta.

Hún segir að þau hjónin séu hæstánægð með að búa í Bandaríkjunum og stefni ekki á að flytja annað á næstunni.

„Það hefur hins vegar líka verið undarlegt að búa hér á þessum tímum í Covid-faraldrinum þar sem ástandið hefur alls ekki verið gott og við höfum verið mikið föst heima við. Það hefur því verið mikill kostur að eiga eins frábæran félaga og Hugo sér við hlið til að létta lundina.“

Nánar um málið
í Morgunblaðinu
Áskrifendur:
Nánar um málið
í Morgunblaðinu
Áskrifendur:
Kauptu vikupassa

Lestu meira með vikupassa!

Fáðu þér vikupassa fyrir 1.890 kr. og þú færð aðgang að öllu efni úr blaði dagsins í dag og næstu 6 daga.

Kaupa vikupassa

Aðrar áskriftarleiðir »

Í loftinu núna
Endalaus tónlist