Pallaball með sterku eurovisionbragði

Tónlistarkonan og eurovisiondívan Regína Ósk mun halda uppi stuðinu með …
Tónlistarkonan og eurovisiondívan Regína Ósk mun halda uppi stuðinu með Páli Óskari á Eurovision-Pallaballi sem verður á beinni á K100 kl. 20:00 á morgun. Ljósmynd: Samsett mbl.is/Eggert

Páll Óskar lætur aflýsingu á Eurovision þetta árið ekki slá sig út af laginu heldur slær upp Eurovision-Pallaballi á K100 á morgun, föstudaginn 8. maí, kl. 20:00, ásamt eurovisiondívunni Regínu Ósk sem verður sérstakur gestur kvöldsins.

„Þótt Eurovision verði ekki haldið með eðlilegu sniði í ár ætlum við að gera okkar besta til að reyna að halda uppi eðlilegu stuði. Þessi dagskrá á föstudagskvöldið verður hluti af því,“ segir Páll Óskar í samtali við K100.is.

„Þetta verður Pallaball í beinni eins og venjulega en með sterku eurovisionbragði,“ bætti hann við.

Hann segir að áherslan verði á Eurovision og sögu söngvakeppninnar en hann muni einnig taka eigin lög inn á milli.

„Og úr því að það er eurovisionþema fæ ég Regínu Ósk með mér sem sérstakan gest. Hún er náttúrlega hokin af reynslu þegar kemur að því að syngja eurovisionlög. Við ætlum að keyra þetta partí áfram saman,“ segir Palli sem hvetur alla til að fylgjast með á föstudagskvöld.

„Ég vona bara að sem flestir hlusti og hækki í botn. Þetta er náttúrlega „stuðprógramm“ þannig að fólk getur alveg dansað með fyrir framan skjáinn,“ bætir hann við.

Fylgstu með Eurovision-Pallaballi í beinni með Páli Óskari og Regínu Ósk á morgun klukkan 20:00 í útvarpinu eða sjónvarpinu á K100.is, í Nova TV sem er opið öllum og á rás 9 í Sjónvarpi Símans.

mbl.is