Bankaviðskipti á Tenerife fyrir þolinmóða

Hafsteinn Egilsson veitingamaður.
Hafsteinn Egilsson veitingamaður. K100

Hafsteinn Egilsson veitingamaður fluttist til Tenerife fyrir um tveimur árum. Hann stendur í töluverðum rekstri á eyjunni ásamt viðskiptafélögum sínum en Hafsteinn rekur þar tvo bari og eitt hótel. Hann ræddi við þá Loga og Sigga í Síðdegisþættinum á K100 en þátturinn var í beinni útsendingu frá Tenerife í síðustu viku.

Fékk „kikkið“

Hafsteinn segist ætla að búa áfram á Tenerife því þar líði honum vel. „Trausti, sonur minn, hefur búið hér 12 ár. Áður fór ég oft í heimsókn til hans í kannski viku eða tíu daga. Síðustu þrjá dagana var ég farinn að hlakka til að fara aftur heim til Íslands.“
Eitt skiptið ákvað Hafsteinn að bregða út frá vananum. „Ég ákvað einu sinni að dvelja í heilan mánuð og þá fékk ég „kikkið“ út úr því að vera hér. Ég fór í allt annan gír. Það lá ekkert á, það hægðist á öllu og manni leið vel. Svo fengum við tækifæri til að fjárfesta hér úti og stukkum á það.“

Tvo og hálfan tíma hjá gjaldkera

Hafsteinn þarf oft að fara í sendiferðir í bankaútibú á Tenerife, rekstrar síns vegna. Það reynir oft á taugarnar þar sem þolinmæðistaugar Íslendingsins eru oft þandar til hins ýtrasta. „Bankakerfið hér fengi ekki háa einkunn heima,“ segir Hafsteinn sem segir skrifræðið oft vera yfirþyrmandi. „Kannski stendur utan á hurð bankans að hann eigi að opna klukkan 08:30. Kortéri síðar, klukkan 08:45, er mögulega verið að snúa lyklinum. Einn daginn þurfti ég að leggja inn en þá var talningarvélin biluð. Gjaldkerinn lokaði þá bara og fór heim. Svona er þetta bara.“

Það tekur sinn tíma að stunda bankaviðskipti á Tenerife og Hafsteinn rekur, í skemmtilegu spjalli við þá félaga sem hægt er að hlusta á í spilaranum hér fyrir neðan, að síðasta ferð hans í bankann hafi tekið tvo og hálfan klukkutíma. Gjaldkerinn tók m.a. upp á að loka í hálftíma og kúnninn á undan honum í röðinni lenti á kjaftatörn í þrjú kortér. „Það þarf þolinmæði hér. Það er enginn að flýta sér. Starfsfólkið er allt alúðlegt og rólegt og allt fínt hér að öðru leyti,“ sagði Hafsteinn sem fer í sund eftir golf og hlustar á Bubba í sólbaði.


   

mbl.is