Segir grunnskólakerfið ónýtt

Sigríður Karlsdóttir kennari: „Flest vandamál sem börn eru að kljást …
Sigríður Karlsdóttir kennari: „Flest vandamál sem börn eru að kljást við eru foreldravandamál.“ Ljósmynd/K100

„Ég myndi vilja taka út stundatöflur. Einhvers staðar einhvern tímann ákvað einhver að 40 mínútur væri hentugur tími. Við erum enn þá að nota þetta form. Það stoppar allt flæði milli kennara og nemenda,“ sagði Sigríður Karlsdóttir sem hefur stundað kennslu síðan 2006 í samtali við Síðdegisþáttinn á K100 í vikunni. Sagði hún grunnskólakerfið í landinu vera ónýtt og þörf vera á kúvendingu á kerfinu. Hún hefur að eigin sögn verið dugleg að skrifa og gagnrýna grunnskólakerfið og „rugga bátnum“ en hún birti meðal annars skoðanapistil um málefnið undir nafninu „Fokk jú ALLIR“á Vísi.is í síðustu viku.

Sagðist Sigríður í þættinum einnig vilja taka út námsmat og hætta með próf.

„Ég er búin að halda því fram í tvö ár. Maðurinn minn er í doktorsnámi og er búinn að vera í fimm ár að rannsaka námsmat en ég held því samt fram að við eigum að taka út námsmat. Ég vil að við hættum að leika í þessu písa leikriti og þessum samræmdu-prófasirkus. Við erum stanslaust að bera saman nemendur,“ sagði Sigríður og bætti við að kennarar væru einnig oft á tíðum bugaðir út af námsmatskerfinu.

Er ekki að fría foreldra

„Af hverju mælum við ekki árangur í vellíðan. Af hverju erum við alltaf í þessu leikriti að mæla hvað við erum klár. Af hverju horfum við ekki á þetta frá allt öðrum vinkli,“ sagði hún.

Sagðist hún vilja taka fram að hún væri ekki að fría foreldra með gagnrýni sinni á skólakerfið.

„Flest vandamál sem börn eru að kljást við eru foreldravandamál. Við vitum það alveg sem höfum alið upp börn að þau spegla okkur og annað. Ég er ekki að fría foreldrana með þessu en ég er samt að gagnrýna skólakerfið,“ sagði hún.

Spurði hún þáttastjórnendur í framhaldinu hvort þeir hefðu séð börn koma út af sjálfstyrkingarnámskeiðum eins og Dale Carnegie og benti á hversu sjálfsörugg þau væru og fullviss um getu sína.

„Svo horfi ég á mína nemendur og þeir bara: „Ég get ekkert“. Það er eitthvað beyglað þarna. Ef grunnskólinn væri 70% eitt stórt sjálfstyrkingarnámskeið þar sem væri verið að efla þrautseigju, efla náungakærleikann og öll þessi gildi sem við þurfum til þess að vera virkir samfélagsþegnar. Svo gætum við lagt inn þekkingu,“ sagði hún. „Nemendum sem líður illa og eru full kvíða geta ekki lært mikið.“

Barst talið þá að stærðfræðikennslu og Sigríður spurði þáttastjórnendur hvort þeir hefðu notað algebru mikið eftir grunnskólann og svöruðu þeir neitandi.

„Jói sem hefur ekki náð tökum á plús og mínus situr samt í sex tíma í kennslustund að reyna að ná tökum á algebru. Af því að það eru samræmd próf handan við hornið,“ sagði hún og bætti við að betur færi fyrir Jóni ef grunnskólinn myndi taka honum sem einstaklingi og einblína á að styrkja hann.

Mikil þekking í skólum tilgangslaus

„Segjum að það sé sól sem skín í gegnum eldhúsgluggann hjá mér og það er súkkulaði á borðinu sem er að bráðna. Það er vandamál. Grunnskólinn, eins og hann er í mörgum grunnskólum, ég ætla ekki að segja öllum, myndi segja: „Ókei Sigga, hvernig er gardínustöng búin til? Hvaða ár var hún búin til? Hvenær voru gardínustangirnar fluttar til landsins?“ og svo framvegis. Þetta er þekking sem nýtist ekki,“ sagðir Sigríður. „Þekkingin sem myndi nýtast mér væri: Hefur þú hugrekki og þor til að biðja um aðstoð. Grunnskólinn gæti kennt það. Hefur þú þor til að fara á Youtube til að leita þér upplýsinga um það hvernig þú getur sett upp gardínur.“

„Það er svo mikil þekking inni í grunnskólanum sem er verið að kenna og mata sem er tilgangslaus,“ sagði hún.

Sagði Sigríður nauðsynlegt fyrir grunnskólana að mæta nemendum. „En við getum það ekki ef við erum með 28 nemendur í bekk og einn kennara og menningu. Það er fyrst og fremst þessi menning sem skapast. Ef við ætlum að prófa eitthvað nýtt þá er það fjöldinn og menningin sem kæfir það af því að við höfum alltaf gert eitthvað öðruvísi. Við þorum ekki að kúvenda þessu.“

Nánar um málið
í Morgunblaðinu
Áskrifendur:
Nánar um málið
í Morgunblaðinu
Áskrifendur:
Kauptu vikupassa

Lestu meira með vikupassa!

Fáðu þér vikupassa fyrir 1.890 kr. og þú færð aðgang að öllu efni úr blaði dagsins í dag og næstu 6 daga.

Kaupa vikupassa

Aðrar áskriftarleiðir »