Upplagt til áhorfs

Skjáskot úr pólitíska tryllinum Cobra sem segir frá því þegar …
Skjáskot úr pólitíska tryllinum Cobra sem segir frá því þegar Bretland verður rafmagnslaust. IMDB

Það er af nógu að taka af áhugaverðu sjónvarpsefni til að horfa á. Morgunþátturinn Ísland vaknar á K100 fær Björn Þóri Sigurðsson reglulega í viðtal um áhugaverða sjónvarpsþætti og kvikmyndir. Hér er það sem hann mælir með að horfa á, sérstaklega í vondu veðri.

Zoey’s Extraordinary playlist

Þessir gamanþættir verða sýndir á Hulu/NBC um miðjan febrúar en svokallaður „pilot“ er kominn út. Þeir gætu höfðað til þeirra sem höfðu gaman af Ally Mcbeal-þáttunum. Kona er í heilaskanna þegar jarðskjálfti ríður yfir. Eftir skjálftann byrjar hún að heyra dýpstu hugsanir þeirra sem hún hittir. Það, svona eitt og sér, er kannski ekki óyfirstíganlegt. Vandamálið er að hún heyrir hugsanirnar í formi dægurlaga. 

Lincoln Rhyme: The Hunt for The Bone Collector

Sjálfstætt framhald kvikmyndarinnar Bone Collector þar sem Denzel Washington fór með aðalhlutverk. Myndin er byggð á metsölubók eftir Jeffery Deaver. Sýnt á Hulu/NBC.

Deputy

Fox-sjónvarpsstöðin hefur þessa þætti í sýningu. Yfirfógetinn deyr og ólíklegur valkostur af gamla skólanum endar sem yfirmaður stærsta lögregluumdæmis Bandaríkjanna.

The outsider

HBO sýnir þessa spennandi þætti sem byggja á samnefndri bók Stephen King um hryllilegt morð á ungum dreng. Það er eitthvað gruggugt á seyði og örugglega eitthvað meira um að vera.

Cobra

Sky One sjónvarpsstöðin hefur sýningar á pólitísku trylliþáttunum Cobra 17. janúar. Robert Carlyle leikur forsætisráðherra í erfiðri stöðu þegar Bretland verður rafmagnslaust.

Nýtt í bíó

1917

Það má ekki missa af þessari bíóupplifun, að mati Björns. Svo áhorfandinn upplifi atburðarásina sem skýrast voru allar senur kvikmyndarinnar 1917 teknar í einu rennsli.

Gullregn

Íslenska kvikmyndin Gullregn byggir á leikriti eftir Ragnar Bragason en eftir hann liggja sjónvarpsþættir eins og Vaktaseríurnar og kvikmyndir á borð við Bjarnfreðarson og Málmhaus.

mbl.is