Jólalag öðlast vinsældir á ný

Það eru alltaf jólin hjá strákunum í Svörtum fötum því nú skríður lag þeirra, Jólin eru að koma , upp Tónlistann á ný. Lagið kemur aftur á lista í þessari viku og situr nú í 29. sæti.

Röð 5 efstu laga breyttist lítið milli vikna á Tónlistanum. Post Malone er enn á toppnum með lagið Circles . Þar á eftir eru Tones and I með lagið Dance Monkey . Auður skiptir á sæti við Emmsjé Gauta. Lagið Enginn eins og þú situr nú í 3. sæti listans en Malbik með Emmsjé Gauta er í 4. sæti. Aron Can og Friðrik Dór eru áfram í 5. sæti listans með lagið Hingað og þangað .

Hástökkvari vikunnar er söngkonan Selena Gomez með lagið Lose You To Love Me. Það hoppar upp um 14 sæti og situr nú í 9. sæti Tónlistans. Sumir vilja meina að hún sé þarna að syngja beint til fyrrverandi unnusta síns, Justin Bieber. Þau hættu saman í mars í fyrra og svo virðist að sambandsslitin hafi eitthvað haft að gera með texta lagsins, en dæmi hver fyrir sig.

Splunkunýtt á lista, beint í 18. sæti er bandaríski söngvarinn Trevor Daniel með lagið Falling.

Tónlistinn Topp 40 er eini opinberi vinsældalisti landsins, tekinn saman af Félagi hljómplötuframleiðenda. Listinn er sendur út á K100 alla sunnudaga frá klukkan 14 til 16. Meðal gagna sem notuð eru við vinnslu listans eru spilanir á Spotify og á helstu útvarpsstöðvum landsins. Hér má sjá listann í heild sinni.

• 
• Blogga um frétt