Hvað varð um Brother Beyond?

Strákasveitin Brother Beyond sló rækilega í gegn árið 1988.
Strákasveitin Brother Beyond sló rækilega í gegn árið 1988. Mynd: Twitter/@CheerUpPopParty

Hljómsveitin Brother Beyond var ein vinsælasta strákasveit níunda áratugar síðustu aldar en hvað varð um hana? Sumir eru kannski fegnir að þurfa aldrei aftur að hlusta á yfirgengilegt sykurhúðað popp þeirra en aðrir hafa skilning á sakleysinu og einlægninni sem sveif þar yfir vötnum.

Strákarnir hófu ferilinn með að semja eigin lög en það gekk brösulega. Útvarpsstöðin Smooth Radio rekur feril þeirra og segir að það var ekki fyrr en smellismiðirnir Stock, Aitken og Waterman voru fengnir til að leggja hönd á plóg sem Brother Beyond slóg rækilega í gegn. 

Lagið The Harder I Try náði hæst í annað sæti breska listans árið 1988. Þar mátti greinilega heyra áhrif Stock, Aitken og Waterman en þeir voru ekki beint þekktir fyrir að taka miklar áhættur í lagasmíðum. Formúlan virkaði og strákarnir í Brother Beyond fylgdu vinsældunum eftir með laginu He Ain't No Competition sem náði hæst í 6. sæti breska listans.

Því miður náðu strákarnir ekki lengra og seinni plata þeirra Trust féll ekki í kramið. Nathan Moore, söngvari, lét hafa eftir sér að það hafi verið algjört rugl að segja upp samstarfi við lagasmiðina þrjá. „Við sömdum öll lögin á plötuna sjálfir og hún fór beint í ruslið,“ sagði Moore.

Eftir tvær misheppnaðar plötur héldu strákarnir í Brother Beyond sitt í hvora áttina árið 1991. Þeir eiga það þó til að koma saman á endurkomutónleikum fyrir aðdáendur þegar vel liggur á þeim.

Hvar eru þeir í dag?

Nathan Moore, söngvari, fór í annað strákaband sem heitir Worlds Apart. Hann hefur reynt fyrir sér í söngþættinum The Voice og séð um bókanir fyrir aðra söngvara.

Annar meðlimur sveitarinnar, sem kallar sig Eg White, er ennþá tengur tónlistarbransanum og hefur náð langt í lagasmíðum fyrir ekki ómerkilegri tónlistarmenn en Adele, James Blunt, Paloma Faith og Celine Dion. Hann samdi, til dæmis, lagið Leave Right Now sem Will Young gerði ódauðlegt.

Steve Alexander, trommari, túraði í sex ár með Duran Duran og trommar fyrir hina og þessa tónlistarmenn eins og til dæmis Jeff Beck. 

Carl Fysh snéri sér að umboðsbransanum og hefur, meðal annars, starfað með Coldplay og Adele.

David White nældi sér í háskólagráðu í listaháskóla í London, eftir að tónlistarferlinum lauk. Hann hefur sýnt verk sín í Bretlandi og Ísrael.

Hér er vinsælasta lag sveitarinnar, The Harder I try. Myndbandið er mikið þrekvirki en þar sést Nathan Moore, söngvari, á harðaspretti, líklega á eftir strætó.

mbl.is