Jón Axel fluttist til Ítalíu í haust

María B. Johnson og Jón Axel á Ítalíu.
María B. Johnson og Jón Axel á Ítalíu.

Jón Axel Ólafsson er flestum kunnur fyrir störf sín á sviði fjölmiðla. Hann hefur sl. ár stýrt morgunþætti K100, Ísland vaknar, ásamt þeim Ásgeiri Páli og Kristínu Sif. En nú hefur Jón heldur betur skipt um umhverfi því hann fluttist til Ítalíu í síðustu viku ásamt eiginkonu sinni Maríu B. Johnson. Hlustendur K100 þurfa samt ekki að óttast breytingar því hann ætlar að senda morgunþáttinn út frá Ítalíu á hverjum degi.

„Það er einfaldlega búið að vera gamall draumur hjá okkur hjónum að færa okkur um set og dvelja yfir vetrarmánuðina á bjartari og heitari stað, þegar mesti kuldinn og dimman er á Íslandi,“ segir Jón þegar hann er spurður um ástæður þess að þau hjónin ákváðu að flytja út. „Nú voru aðstæður þannig að við gátum látið á þetta reyna og við slógum til. Það tók nokkra daga að venja sig við annað umhverfi og kannski það aðallega að maður er ekki kominn til að vera í fríi, heldur er maður á fullu í vinnu. Maður er bara á öðrum stað að sinna verkefnunum og vinnunni. En sólin og hitinn kemur undirmeðvitundinni til að halda að um frí sé að ræða.“

Í sólinni á Suður-Ítalíu

Þau Jón og María fluttust til borgarinnar Bari sem er við Adríahafið á Suður-Ítalíu. Þetta er nú ekki alveg sá staður sem Íslendingum dettur fyrst í hug þegar minnst er á landið. „Það var María konan mín sem fann þennan stað. Það hafði komið til greina að vera á Spáni, en við erum bæði mikið fyrir Ítalíu og því var það á endanum valið okkar. Bari er á Suður-Ítalíu, eiginlega eins sunnanlega og hægt er að fara og mestar líkur á góðu og jöfnu veðri yfir vetrarmánuðina. Við fórum bara að gúggla þessa borg og svæðið hér í kring og úr varð að við pökkuðum niður og flugum hingað út.“

Það er mikið mál að skipuleggja svona flutning og maður þarf að vera viðbúinn því að aðlagast breyttu umhverfi. Google er besti vinurinn þegar kemur að því að skipuleggja svona flutninga, segir Jón. „Þetta er búið að taka marga mánuði og því meira sem maður gúgglar og skoðar því betur áttar maður sig á hlutunum. Hvaða hverfi eru góð og hver ekki. Hvernig íbúð maður vill og hvernig ekki og eftir miklar pælingar enduðum við á að leigja okkur aðstöðu í gamla bænum í Bari þar sem við erum með bæði litla skrifstofu og svefnherbergi. Þetta er allt voðalega sérstakt, að hoppa úr bubblunni sinni, rútínunni, heimilinu sínu og flytja inn í litla skonsu með alltof litlu baði, pínulitlu rúmi og gargandi ítölskum kerlingum allt í kring. Mjög sérstakt og einstakt tækifæri að fá að sjá eitthvað annað en maður er vanur.“

Heldur áfram í vinnunni þrátt fyrir flutning

Hlustendur K100 þurfa ekki að óttast að breyting verði á morgunútvarpi stöðvarinnar þar sem Jón mun senda þáttinn út á hverjum degi frá Bari. Það hlýtur þó að vera krefjandi að vinna með tveimur öðrum að þætti og vera ekki á sama stað og þau. „Jú, vissulega er það áskorun að halda úti fjögurra tíma útvarpsþætti með tveimur öðrum einstaklingum í beinni útsendingu, í 4,715 kílómetra fjarlægð. Þó það nú væri. Ef ekki væri fyrir fagmennsku vinnufélaganna og reynslu væri þetta ekki hægt. Allt þarf að ganga smurt upp, líkt og maður væri á staðnum þannig að vinir okkar sem hlusta á hverjum degi heyri engan mun. Þeir vilja stöðugleika og sína skemmtun á hverjum degi, hvar sem við erum stödd í heiminum,“ segir Jón og bætir við að þau hjón muni hafa í nægu að snúast á meðan þau dvelja úti. „Sem betur fer höfum við hjónin líka mörgum verkefnum að sinna og við höldum þeim áfram hér úti. María vinnur fyrir Eddu útgáfu og hún sinni verkefnum sínum nánast með sama hætti og væri hún heima og sama er með mig.“

Stúdíóið hans Jóns á Ítalíu
Stúdíóið hans Jóns á Ítalíu

Jón segir að tæknilega sé það ekki svo flókið að senda út heilan útvarpsþátt frá Ítalíu á 21. öldinni. „Ég er svo heppinn að eiga lítið útvarpsstúdíó sem samanstendur af nokkrum flóknum og dýrum tækjum sem gerir mér kleift að vera í morgunþættinum Ísland vaknar á hverjum morgni milli 6 og 10, líkt og ég væri heima á Íslandi með krökkunum í stúdíóinu í Hádegismóum. Að vera á Ítalíu breytir í sjálfu sér litlu. Við erum saman í hljóði og mynd á meðan þátturinn er í loftinu og síðan erum við í símanum allan daginn að undirbúa næsta dag. Það er allt hægt orðið með netinu og þetta er bara eitt af því,“ segir Jón sem er þakklátur fyrir tímamismuninn. „Klukkan á Ítalíu er núna tveimur tímum á undan, þannig að ég byrja kl. 8 hér í stað kl. 6 á Íslandi. Það munar ansi miklu!“

Mælir með að fólk láti drauminn rætast

Spurður hvort Jón mæli með því að taka sig svona upp og flytjast af landi brott segist hann gera það. „Ekki spurning. Þetta er einfaldara en það hljómar. Það þarf eiginlega að láta bara slag standa og kýla á það. Maður á alltaf að láta drauma sína rætast með einhverjum hætti, en forsendurnar þurfa að vera réttar og þá láta tækifærin á sér kræla. Það eykur víðsýnina að fá tækifæri til að búa erlendis, þó ekki sé nema í stuttan tíma, og átta sig á að það er líka fólk annars staðar í heiminum, með ólíka sýn á lífið, með aðrar þarfir og annað sjónarhorn. Ísland er frábært og maður yfirgefur það aldrei,“ segir Jón. En ætli hann komi einhvern tímann aftur heim? „Thja. það veit maður ekki, a.m.k. ekki núna. Veðráttan hentar mér betur, þó að það sé gaman að horfa stundum í storminn. Það fer svo auðvitað eftir því hvað verður. Verkefnin sem maður er að vinna í verða að segja svolítið til um það hvert framhaldið verður. En ég er hér núna með konunni minni og okkur líður vel í 27 stiga hita og sól. Verðlagið fær mann til að brosa í kampinn þegar maður fer út í búð hér því munurinn er slíkur að maður hrekkur í kút, því venjuleg helgarinnkaup eru ca 20 til 25% af því sem kostar að lifa á Íslandi. Maður getur alveg vanist því,“ segir Jón hamingjusamur með Maríu sinni á Ítalíu.

mbl.is
Í kringum síðustu aldamót má segja að Skítamórall hafi tekið yfir tónlistarsenuna á Íslandi og varla var á þeim tíma haldið gott partý án þess að hljómsveitin kæmi fram.
Ísland vaknar

Skítamórall heldur upp á 30 ára afmæli

13 ára töffarar á Selfossi stefndu hátt og ætluðu að spila harða tónlist í ætt við Deep Purple. Nánar

Elín Sif Halldórsdóttir er hæfileikarík listakona.
Fréttir

Tjáir tilfinningar með tónlist

Söng- og leikkonan Elín Sif Halldórsdóttir hefur í mörgu að snúast þessa dagana. Margir muna eftir henni úr kvikmynyndinni „Lof mér að falla“ þar sem hún sýndi sannkallaðan stórleik í hlutverki Magneu. Nánar

Robin, Barry og Maurice Gibb. Myndin var tekin árið 1997.
Fréttir

Kvikmynd um Bee Gees í bígerð

Graham King, sem framleiddi meðal annars kvikmyndina Bohemian Rhapsody um Freddie Mercury og Queen, hefur hafið undirbúning kvikmyndar um hljómsveitina Bee Gees. Nánar

Skjáskot úr þýsku þáttunum We are the Wave sem sýndir eru á Netflix.
Fréttir

Nýtt á Netflix um helgina

Björn Þórir Sigurðsson fór yfir nýjustu bíómyndir og þætti í morgunþættinum Ísland vaknar á K100 í vikunni. Það er margt áhugavert að sjá um helgina. Nánar

Ellý Ármanns spáði fyrir Þorgerði Katrínu í beinni á K100.
Ísland vaknar

Spáir Þorgerði hásæti

„Ég er ekki að fara að sækja um eitt eða neitt en þetta er samt áhugavert,“ sagði Þorgerður Katrín Gunnarsdóttir, formaður Viðreisnar, þegar spákonan Ellý Ármanns lagði spilin á borð fyrir hana í beinni útsendingu á K100 í morgun. Nánar

Sigríður Einarsdóttir, flugstjóri.
Fréttir

Flogið þotum í 35 ár

Sigríður Einarsdóttir, flugstjóri, er fyrsta konan sem fékk starf sem flugmaður og síðar flugstjóri hjá Flugleiðum/Icelandair. Hún hóf störf í desember árið 1984 svo það fer að styttast í 35 ára starfsaldur hennar hjá fyrirtækinu. Nánar

Cleverly var mættur í upptökuverið og tilbúinn að veita viðtal í beinni útsendingu þegar hann skyndilega hætti við. Þá voru góð ráð dýr fyrir bresku sjónvarpskonuna.
Fréttir

Tók viðtal við stól

Breski þingmaðurinn James Cleverly, sem jafnframt er formaður Íhaldsflokksins þar í landi, neitaði á þriðjudag að mæta í viðtal við sjónvarpskonuna Kay Burley á Sky sjónvarpsstöðinni. Key tók viðtal við stólinn þar sem hann átti að sitja. Nánar

George Michael lést á jóladag árið 2016.
Fréttir

Nýtt lag með George Michael komið út

Lagið „This Is How (We Want You To Get High)“ er farið að hljóma á öldum ljósvakans. Nánar