Nýtt lag tileinkað Sálinni

Síðastliðið vor hélt lagahöfundurinn Einar Bárðarson upp á 20 ára starfsafmæli en árið 1998 kom „Farinn“ út með hljómsveitinni Skítamóral og varð lagið þeirra allra vinsælasta. Einar kíkti í spjall til Huldu og Loga í síðdegisþátinn á K100 vegna útgáfu nýs lags sem hann flytur sjálfur ásamt Einari Ágústi Víðissyni, félaga sínum og liðsmanni Skítamórals. 

Lagið heitir „Okkar líf“ og er það eina nýja lagið á plötunni „Myndir“ sem kemur út föstudaginn næstkomandi. Lagið er falleg ástarsaga og einnig samið og tileinkað Sálinni hans Jóns míns, sem hætti störfum í haust. Hann segist þakklátur að hafa verið undir þeirra áhrifum og í raun hafi popptónlist Sálarinnar verið honum hvatning til að semja og búa til tónlist sjálfur á sínum tíma. Hann segir nýja lagið sitt litla ástarsögu úr borginni, en sú saga byrjar einmitt á tónleikum Sálarinnar hans Jóns míns í Loftkastalanum árið 1999. 

Höfundurinn ætlar að fagna útgáfu plötunnar með sögustund og „singalong“ tónleikum í Hvíta húsinu á Selfossi á föstudagskvöldið og svo í Bæjarbíói í Hafnafirði á laugardag. Úrval söngvara kemur fram með Einari á tónleikunum og hljómsveitina skipa þeir Þórir Úlfarsson á píanó og hammond, Eiður Arnarsson á bassa, Hannes Friðbjarnarson á trommur og þeir Kristján Grétarsson og Pétur Valgarð Pétursson á gítara.

Hér að neðan má nálgast lagið og viðtalið úr síðdegisþættinum. 

• 
• Blogga um frétt