Hugleiðsla í alltumlykjandi sýndarveruleika

Þóra Björk hér með Oculus GO og Tristan ánægð með …
Þóra Björk hér með Oculus GO og Tristan ánægð með sigur Flow VR í Gullegginu 2018. Mynd/K100

Viðskiptahugmyndin Flow VR sigraði í Gullegginu 2018, frumkvöðlakeppni Icelandic Startups. Þóra Björk Elvarsdóttir og Tristan Elizabeth Gribbin kíktu til Huldu og Loga til að segja frá hugmyndinni og uppsprettu tækifæra í öllum heiminum með þetta fyrirbæri.

Í raun er hugmyndin sú að þú setjir á þig ákveðin gleraugu sem færa þér annan heim, eða alltumlykjandi sýndarveruleika, sem færir þér hugarró. Svo getur notandinn snúið sér í 360° hring og umhverfið virðist með þér, sama hvert þú snýrð þér. Flow VR býður upp á sex mismunandi útgáfur af hugleiðslu, en sem dæmi má nefna öndun, hreyfingu og að sleppa takinu. 

Tæki sem róar fólk

Streita, áreiti og hraði er eitthvað sem flestir kannast við og eru margir leitandi inn á við eftir frið og hugarró. Veikindi og kulnun á vinnumarkaði kosta fyrirtækið orðið mikið og því ákváðu Tristan og Þóra Björk að reyna að finna lausn á hugleiðslu sem virkar fyrir menn og markaði. Hugleiðsla virkar og hefur verið sýnt fram á það vísindalega og í dag er stafræn hugleiðsleiðsla ört vaxandi atvinnugrein. Þær hafa þróað lausnina Flow VR, sem er sýndarveruleiki í gegnum Oculus GO-höfuðsettin eða Samsung Gear VR. Þóra Björk segir fyrirtæki geta nýtt sér þetta fyrir starfsmenn sína og á aðeins fjórum mínútum getur starfsmaður fengið íhugun sem annars tæki klukkustund í sal úti í bæ.

Í viðtalinu setti Logi á sig sýndarveruleikatækið og á aðeins sekúndum var hann kominn inn í umhverfið á Þingvöllum, með róandi tóna í tækinu þannig að tilveran var gjörbreytt á nokkrum sekúndum og aðvelt að leiða hugann að öðru en amstri hversdagsins. Þær segjast vera með þá sérstöðu á markaðnum að bjóða up á 360° af hreinni íslenskri náttúru og vandaða íslenska tónlist undir frá alþjóðlegum tónlistarmönnum á borð við Sigur Rós.

Raunverulegt á toppi Everest

Þær stöllur voru á Startup-námskeiðinu þegar Tristan var fengin til að lesa inn á myndband frá leikjaframleiðandanum Sólfari, sem framleiðir meðal annars Everest upplifunarumhverfi. Tristan segist hafa upplifað eitthvað magnað og þar hafi hún virkilega fengið hugljómun og trú á því að milljarðar manna myndu kunna að meta nákvæmlega þessa upplifun. Að fá að vera á toppi veraldar í gegnum tæki hlyti að vera eitthvað sem ætti erindi til margra.

Risamarkaður fyrir lausnina

„Eftir að Facebook keypti Oculus þá segja þeir að það séu tveir milljarðar sem þeir muni vilja selja þessi headset,“ útskýrir Þóra Björk þegar hún er spurð um markhópinn og kaupandann að tækjum og smá símaforritum sem þessum. Hún segir þær ætla að einbeita sér að fyrirtækjamarkaði fyrst um sinn, enda sé kulnun og streita eitthvað sem kallar á að fyrirtæki geti boðið upp á einhver úrræði.

Þetta er sagt árangursríkt, jafnvel á fjölmennum háværum stöðum svo sem á flugvöllum og fjölmennum vinnustöðum. Og tækifærin virðast endalaus, enda ekki bara fyrir aktívt fólk að íhuga og gleyma sér í nokkrar mínútur, heldur einnig tækifæri fyrir fólk sem kemst hvergi, að fá tækifæri til að ferðast um heiminn, upp á fjöll, út í geim eða um fallega íslenska náttúru með Flow VR. Þær stöllur eru greinilega bara rétt að byrja og í lok þessa mánaðar keyra þær í gang pilot-verkefni á Norðurlöndunum.

Logi Bergmann, annar þáttastjórnenda síðdegisþáttar K100, prófaði fyrirtbærið og hvarf …
Logi Bergmann, annar þáttastjórnenda síðdegisþáttar K100, prófaði fyrirtbærið og hvarf í nokkrar sekúndur til Þingvalla við undirleik Sigur Rósar. Mynd/K100
Hér er sýnishorn úr íslenskri náttúru sem er hluti af …
Hér er sýnishorn úr íslenskri náttúru sem er hluti af þeim sex ólíku hugleiðsluleiðum sem Flow VR hefur framleitt. Mynd/Flow VR
mbl.is
Í loftinu núna
Endalaus tónlist