„Ég er svona baráttukona“

Fida Abu Libdeh, framkvæmdastýra og stofnandi geoSilica sem nýverið fékk …
Fida Abu Libdeh, framkvæmdastýra og stofnandi geoSilica sem nýverið fékk inn nýtt hlutafé. mbl.is/Eva Björk Ægisdóttir

Fyrirtækið Geo Silica er metið á um 700 milljónir og sjá margir tækifæri í kíslinum en ekki síst tækninni sem notuð er til að vinna hann og skilja frá. Stofnandinn Fida Abu kíkti í Magasínið ásamt Anítu Hauksdóttur orkuverkfræðingi sem gekk til liðs við teymið á árinu. 

Kísill jafnmikilvægur magnesíum og kalki

Fida Abu stofnandi Geo Silica er fædd og uppalin í Palestínu en 16 ára gömul flutti hún hingað til lands. Fyrirtæki hennar varð til í framhaldi af lokaverkefni hennar í orku- og umhverfistæknifræði en þar sá hún strax möguleikann á kísli sem steinefni fyrir líkamann. „Þetta er aðaluppistaðan í hári, húð og nöglum,“ segir Fida og Aníta tekur undir mikilvægi kísilsins, enda sé þetta jafnmikilvægt magnesíum og kalki. Það sé þekkt erlendis en hún segir okkur Íslendinga svolítið eftir á í þessum fræðum.

Aðferðin skapar sérstöðu

Í lok árs 2014 kom vara Geo Selica fyrst á markað sem hágæða kísilfæðubótarefni og þótti aðferðin sem þau höfðu þróað við kísilvinnsluna algjör nýjung. Aðferðin mun mögulega skapa fyrirtækinu mikla sérstöðu enda um fullkomlega hreina náttúruafurð að ræða eftir vinnsluna. Þær stöllur sjá því mikil tækifæri fram undan og á dögunum komu inn nýir hluthafar sem lögðu til 40 milljónir króna fyrir um 6% hlut í þessu spennandi sprotafyrirtæki.

Alin upp við átök og stríð

„Það hafa komið upp ýmsar áskoranir,“ segir Fida sem segir það þó bara styrkja sig í baráttunni við að koma fyrirtækinu á laggirnar. „Ég er baráttukona,“ segir hún enda alin upp við átök og stríð og ljóst að hér er andlega sterkur frumkvöðull á ferð sem lét hvorki tungumálið, lesblindu né aðrar hindranir stöðva sig í að sækja menntun og komast fremst á meðal jafningja. 

Hér má hlusta á viðtalið í heild. 

mbl.is