Matarhátíð á laugardaginn

Reykjavík Food Festival verður haldin á Skólavörðustígnum laugardaginn 11. ágúst. Hátíðin, sem gengið hefur undir nafninu Reykjavík Bacon festival, hefur vaxið gríðarlega undanfarin ár og mun nú ekki aðeins beikon vera á boðstólnum heldur munu gestir og gangandi geta notið alls þess besta sem íslenskir bændur hafa upp á að bjóða.

Þeir Þorbjörn Sigurbjörnsson, skipuleggjandi hátíðarinnar, Prophet John Whiteside, æðsti spámaður the United Church of Bacon, og Marshall Porter, einn af skipuleggjendum Blue Ribbon Bacon Festival í Ameríku, voru gestir í Ísland vaknar í morgun þar sem þeir fóru yfir það helsta sem verður á dagskrá matarhátíðarinnar.

„Við ætlum að gera allri matarflóru Íslands hátt undir höfði,“ segir Þorbjörn en matarmiðar verða seldir í miðasölutjöldum sem staðsett verða á nokkrum stöðum á Skólavörðustígnum. Boðið verður upp á fjölda skemmtiatriða, lifandi tónlist og ýmislegt fleira, sem mun gera hátíðina að veislu fyrir augu og eyru, sem og auðvitað bragðlaukana.

Skipulagning hátíðarinnar hefur öll verið unnin í sjálboðavinnu og ágóði af hátíðinni hefur runnið til góðgerðarmála, en undanfarin ár hafa Barnaspítali Hringsins, hjartadeild LSH, Umhyggja og æfingastöð Styrktarfélags lamaðra og fatlaðra styrkt til tækjakaupa. 

Hægt er að hlusta á viðtalið við þá félaga hér að neðan.

Ísland vaknar er á dagskrá alla virka morgna frá kl. 6.45 til kl. 9.00 á K100 og á rás 9 hjá Sjónvarpi Símans.


 

mbl.is