Páll Óskar með Rocky Horror vagn

Rocky Horror söngleikurinn hefur verið sýndur í Borgarleikhúsinu að undanförnu …
Rocky Horror söngleikurinn hefur verið sýndur í Borgarleikhúsinu að undanförnu en þar er fjallað um mikilvægi þess að fá að vera sá sem maður er með öllum sínum sérkennum og sérstöðu.

Gleðiganga Hinsegin daga fer fram laugardaginn 11. ágúst og þykir mörgum það hápunktur göngunnar þegar vagn Páls Óskars Hjálmtýssonar birtist. Þáttastjórnendur Magasínsins, síðdegisþáttarins á K100, heyrðu í söngdívunni sem var að pakka niður búningum fyrir mikla og stóra helgi í skemmtanahaldi, en þó um leið að undirbúa Gleðigönguna þar sem vísindamaðurinn og klæðskiptingurinn Frank-N-Furter mun koma við sögu.

Diskókúlur munu hreyfast upp og niður

Páll Óskar sagðist ætla að skemmta um land allt um þessa helgi, en sagðist hefja leik á Flúðum og troða upp í kvöld á eftir Sóla Hólm sem verður með uppistand. Síðar heldur Páll Óskar á þjóðhátíð í Eyjum þar sem hann mun dansa í kringum diskó-kúlur sem „hreyfast upp og niður“. Það er því ljóst að enn og aftur mega áhorfendur eiga von á óvæntri nálgun og einstakri framkomu diskókóngsins í Dalnum í Vestmannaeyjum. Að því loknu fá gestir í Hofi á Akureyri að njóta Palla-stuðs um helgina, en þar verður hvergi slegið af í glamúr og glæsileika. 

Verður Frank-N-Furter í Gleðigöngunni

Og nú styttist í Hinsegin daga, sem fara fram 7. -12. ágúst og er Gleðigangan gjarnan hápunkturinn. Páll Óskar stendur undir nafni þar sem einn flottasti skemmtikraftur landsins enda ávallt með íburðarmesta vagninn í göngunni og dansatriðin og búningarnir eftir því. Þáttastjórnendur Magasínsins urðu því að fá að heyra hvort eitthvað mætti opinbera í ár í þeim efnum og gaf Páll Óskar það upp að þemað í ár yrði Rocky Horror, en undanfarna mánuði hefur hann farið með hlutverk Frank-N-Furter í uppsetningu Borgarleikhússins á söngleiknum. Slíkt hið sama gerði hann árið 1991 þegar hann lék einnig klæðskiptinginn og vísindamanninn í uppfærslu Menntaskólans við Hamrahlíð á söngleiknum. 

Viðtalið við Pál Óskar má nálgast hér að neðan. 

mbl.is
Í loftinu núna
Endalaus tónlist