Sem stormsveipur á sviðinu

Dagur Sigurðsson fékk áhorfendur söngvakeppnarinnar heldur betur með sér í lið í undakeppninni þegar hann flutti lagið sitt „Í stormi“. Það má í raun líkja kraftinum í rödd hans við storm. Dagur vakti fyrst athygli þegar hann sigraði Söngkeppni framhaldsskólanna árið 2011 og hefur síðan þá verið syngjandi á hinum ýmsu sviðum um allt land. 

Í ár tekur hann þátt í söngvakeppninni með lag Júlís Heiðars, „Í stormi“, og það gerir hann heldur betur kröftuglega. Hann sló svo í gegn á undankvöldinu að nafn hans heyrðist ítrekað kallað í salnum þegar tilkynnt var um úrslit. Dagur mun flytja lagið á íslensku á lokakvöldinu en ákvörðun um það var tekin á dögunum, þrátt fyrir að lagið hafi verið upphaflega samið á ensku. 

Þegar Dagur var beðinn um að rifja upp Eurovision-minningu reikar hugur hans aftur til ársins 2009 þegar Jóhanna Guðrún flutti hið ódauðlega Is it true. „Bróðir minn hélt upp á þrítugsafmælið sitt einmitt þegar úrslitakvöldið var og keppnin var í beinni á risaskjá. Hann var búinn að plata mig og hljómsveitina mína í að spila smá fyrir dansi í lokin. Við plönuðum að við myndum nú telja í Is it true ef lagið færi langt sem mann svo sem grunaði. Það varð svo raunin og töldum við í lagið strax að keppni lokinni,“ segir Dagur. Það eru eflaust margir sem væru til í að heyra þennan gullbarka takast á við lagið og er hér með áskorun komið á framfæri til Dags að flytja þetta lag opinberlega.

Dagur kom við í Eurovision Live Lounge K100 og flutti öðruvísi útgáfu af laginu sínu. Þú getur séð flutninginn í spilarnum hér að ofan. Þú getur svo horft á viðtal Sigga Gunnars á K100 við Dag og Júlí Heiðar frá því í janúar í spilaranum hér að neðan. 

Dagur Sigurðsson í Eurovision Live Lounge K100.
Dagur Sigurðsson í Eurovision Live Lounge K100.
mbl.is