Fjórbrotinn á handlegg og missti af Eurovision

Ari, sem er aðeins 19 ára gamall, hefur komið víða fram síðan hann var lítill, leikið Óliver í Þjóðleikhúsinu og í nokkrum sýningum í Borgarleikhúsinu, sungið margoft í Hörpu m.a. með Sissel Kyrkjebø og komst á dögunum inn í einn virtasta tónlistarskóla heims, The Royal Academy of Music, í London þar sem hann mun hefja framhaldsnám í söng í haust.

Erlendir sérfræðingar hafa spáð því að lagið og sjarminn hans gæti slegið í gegn í Portúgal í vor og hafa einhverjir borið frammistöðu hans saman við það þegar Jóhanna Guðrún sló í gegn á sínum tíma. 

Ari á einmitt eina Eurovisionminningu tengda Jóhönnu Guðrúnu sem tók þátt í Eurovision árið 2009 en Ari hafði verið sérstaklega spenntur fyrir keppninni. „Ég dýrkaði Alexander Rybak og hlakkaði mikið til þess að fylgjast með keppninni. Þarna var ég 11 ára gamall,“ segir Ari en kvöldið átti heldur betur eftir að taka óvænta stefnu. „Ég var staddur í stúdentsveislu og til að stytta biðtímann eftir keppninni skelltu ég og frændur mínir okkur út að leika. Við fórum að hanga í einhverjum mörkum út á fótboltavelli en þar sem markið sem við héngum í var óstabílt endaði það þannig að ég fékk bæði markið og frænda minn ofan á mig. Það blæddi mikið og það var auðvitað rokið beint með mig upp á slysó til að sinna meiðslunum. Það kom svo í ljós að hendin var brotin á fjórum stöðum. Ég missti því af Jóhönnu Guðrúnu og Alexander á sviðinu og keppninni sem ég hafði beðið svona spenntur eftir að sjá,“ segir Ari sem ætlar ekki að endurtaka leikinn á laugardaginn og brjóta sig fyrir keppni. 

Ari er fyrsti gestur í „Eurovision Live Lounge“ K100. Horfðu á Ara flytja aðeins öðruvísi útgáfu af laginu sínu „Our Choice“ í spilaranum hér að ofan. 

Í spilaranum hér að neðan getur þú svo hlustað og horft á viðtal Sigga Gunnars við Þórunni Ernu Clausen, höfund lagsins, og Ara sem tekið var fyrir undankeppnina. 

 

Sjáðu myndbandið við lag Ara hér að neðan. 

 

 

Ari Ólafsson í Eurovision Live Lounge K100.
Ari Ólafsson í Eurovision Live Lounge K100.
mbl.is