Samdi lagið í sturtunni

Ingileif ásamt unnustu sinni Maríu Rut Kristinsdóttur.
Ingileif ásamt unnustu sinni Maríu Rut Kristinsdóttur. Úr myndbandinu.

„Ég hef verið að vinna í fjölmiðlum undanfarin 4 ár og verið í laganámi meðfram því þannig að ég var einhvernvegin ekki alveg að fara að gefa út tónlist en svo gerðist þetta óvart,“ segir Ingileif Friðriksdóttir sem í dag sendi frá sér sitt fyrsta lag. „Ég held að þetta hafi komið mjög mörgum á óvart. Ég hef verið að syngja í laumi og þeir sem þekkja mig vita að ég hef sungið lengi en þetta er fyrsta lagið sem ég sem,“ segir Ingileif en lagið varð til í sturtu. „Ég var í sturtu og byrjaði að raula. Svo sagði unnastan mín mér að ég ætti að fara með þetta eitthvað lengra,“ bætir Ingileif við sem ákvað nokkru síðar að hafa samband við Ásgeir Orra úr StopWaitGo sem vann lagið áfram með henni.

Yrkisefni lagsins er persónulegt. „Það fjallar um það þegar ég var týnd og kunni ekki á tilfinningar. Svo kom ég út úr skápnum og byrjaði með konunni minni. Þá var einhvernveigin eins og það kveiknaði á einhverri peru innra með mér,“ segir Ingileif sem segist hafa haldið að hún væri tilfinningalaus en síðan hafi annað komið í ljós þegar hún kynntist konunni sinni. Myndbandið sem Birta Rán Björgvinsdóttir leikstýrði og Arnar Steinn Einarsson tók upp endurspeglar texta lagsins þar sem ástfangnar konur sjást fagna ástinni. 

Horfðu á viðtal Sigga Gunnars á K100 við Ingileif frá því í morgun í spilaranum hér að neðan.

 

Sjáðu myndbandið við lagið hennar Ingileifar hér. 

mbl.is