Regína hefur áhyggjur af Svenna sínum þessa dagana.

Hún sagði frá því í morgunþættinum þegar hún fór með eiginmanni sínum, Svenna, á bílasölu fyrir skemmstu. Svenni, sem nýlega útskrifaðist úr húsasmíðanámi, hefur einstaklega mikinn áhuga á tækjum, tólum og öllu sem tengist framkvæmdum. Nú síðast hefur athyglin beinst að pallbílum – og það tók bílasalann ekki langan tíma að átta sig á því.

„Jæja… er hann kominn með Pallbílaveiruna?“ spurði sölumaðurinn Regínu, sem vakti strax mikla kátínu í stúdíóinu.

Í kjölfarið fóru þáttastjórnendur að ræða hvort þetta væri raunverulegt fyrirbæri – og niðurstaðan var skýr.

Þetta byrjar gjarnan saklaust:

„Það væri nú praktískt að eiga pallbíl…“
„Maður gæti sótt timbur.“
„Það er svo gott pláss.“
„Ég þarf kannski að draga eitthvað.“

Svo áður en maður veit af er YouTube orðið fullt af pallbílamyndböndum, fólk farið að bera saman dekk, skoða dráttargetu, ræða fjöðrunarkerfi og allt í einu orðið sérfræðingar í pallhæð og vinnuljósum.

Þáttastjórnendur bentu á að þetta væri sérstaklega algengt hjá fólki sem vinnur við smíðar eða verkleg störf, er mikið í framkvæmdum, hefur gaman af útivist – eða bara elskar græjur almennt.

Umræðan vakti greinilega mikla tengingu hjá hlustendum og margir könnuðust við að hafa annaðhvort fengið þessa „veiru“ sjálfir eða búið með einhverjum sem er haldinn henni.

Ef þú misstir af þessari stórskemmtilegu umræðu þá er algjörlega þess virði að smella á hljóðbrotið sem fylgir greininni. Þar fara þáttastjórnendur yfir málið og spá þau því að líkur séu góðar að einhver sem þú þekkir sé með einkenni.