Umræðan byrjaði á því að velta upp spurningunni á hvaða dögum fólk eyðir mestum peningum og hvort ákveðnir dagar vikunnar væru líklegri en aðrir til að enda í pirringi eða rifrildi á heimilinu. Fljótlega fór umræðan að snúast yfir í eigin reynslu þáttastjórnenda – og þar komu ýmis skemmtileg svör fram.

Jón Axel sagðist til að mynda aldrei hafa rifist við eiginkonu sína þrátt fyrir að þau hafi verið gift í meira en tíu ár, sem vakti bæði undrun og efasemdir í stúdíóinu. Ásgeir Páll sagðist hins vegar muna nákvæmlega hvenær síðasta rifrildi hans og Elínar átti sér stað – í október síðastliðnum.

Regína Ósk viðurkenndi aftur á móti að hún og Svenni hennar skiptust reglulega á skoðunum. Hún vildi þó ekki meina að um rifrildi væri að ræða heldur frekar lífleg skoðanaskipti þar sem bæði fengju að segja sitt.

Eitt var þó ljóst í lok umræðunnar – sama hvort fólk rífst mikið, lítið eða alls ekki, þá virðist léttleiki og húmor vera besta leiðin til að komast í gegnum daglegt líf.